LFCS chu 'Serchhip chanchin nena inzawm tlat, khawtlang nun kaihruaitu leh chhertu pawimawh tak a ni' tiin hun lo awm leh zel turah pawh, an thupui 'In Thy Light We Shall See Light' tih chu vawng nung zel a, naupangte nun kawng kawhhmuhtu leh kaihruaitu, eng mawi tak ni zel turin duhsakna a hlan bawk.

Chief Minister chuan zirna a ngaih pawimawh thu sawiin, zirtirtu pawh eng emaw zat lak thar an nih bakah, hmun hrang hrangah zirna in tih changtlun mek zel a nih thu te, zirtirtute quarters sak mek a nih thu te, zirna sang zawkte pawh ngaih pawimawh niin NIT Mizoram harsatna pawh chinfelsak an nih tawh thute a sawi.

"Mizoram Engineering College pawh a taka kaltir tumin thapui kan thawh mek a, Mizoram State University pawh kan bawhzui zel a, thangthar lo awm zel turte tan hian zirna tha zawk neih kan tum a ni" a ti bawk.

Serchhip DC Paul L. Khuma; Headmistress Sr. Wilma; Rev. Sr. Milly Fernandes, Ursuline Franciscan Educational Society leh Vicar General Rev. Fr. Joseph Lalbiakthanga te'n thu an sawi bawk a. Zirlai naupangte'n zai leh lam bakah, hnam lam, rimawi tum leh hmuhnawm chi hrang hrangte an entir bawk a ni.

Khualzahawm Most Rev. Joachim Waldera'n malsawm tawngtaina hmangin LFCS Golden Jubilee lawmna hun hi a khar a ni.

Little Flower Convent School hi Feb 2, 1976-ah din a ni a, a thupui chu "In thy Light We See Light" a ni. A tirah zirlai 18 chauh awm-in, Catholic Kohhranin kum 14 a enkawl hnuah 1990-ah Mizoram Sorkar-in zirtirtu 6 leh staff 1 Deficit Pay Scale-in a rawihsak tan a. SSA hnuaiah tih changtlun chhunzawm zel niin, tunah zirtirtu 10-ah tihpunsak an ni tawh bawk a ni.